நடிகர் சங்கம் அறிக்கை : 20-ந்தேதி பொதுக்குழு கூட்டம்

Bookmark and Share

 நடிகர் சங்கம் அறிக்கை : 20-ந்தேதி பொதுக்குழு கூட்டம்

தென்னிந்திய நடிகர் சங்கம் வெளியிட்டுள்ள ஒரு அறிக்கையில் கூறியிருப்பதாவது:-

தென்னிந்திய நடிகர் சங்கத்தின் 62-வது ஆண்டு பொதுக்குழு கூட்டம் வருகிற 20-ந்தேதி (ஞாயிற்றுகிழமை) மதியம் 2 மணிக்கு சென்னை நுங்கம்பாக்கம் லயோலா கல்லூரி வளாகத்தில் உள்ள பெர்ட்ராம் அரங்கில் நடிகர் சங்க தலைவர் நாசர் தலைமையில் நடைபெறுகிறது.

புதிய நிர்வாகம் பொறுப்பேற்ற பின் நடைபெறும் முதல் பொதுக்குழு கூட்டம் என்பதால், இது மிக முக்கியத்துவம் வாய்ந்ததாக அமைகிறது.

நடிகர் சங்கத்தின் வேண்டுகோளுக்கு இணங்க தமிழ் திரைப்பட தயாரிப்பாளர் சங்கம் மற்றும் தென்னிந்திய திரைப்பட தொழிலாளர்கள் சம்மேளனம் (பெப்சி) ஆகிய அமைப்புகள் அன்றைய தினம் பொதுக்குழுவிற்காக படபிடிப்புகளை ரத்து செய்து விடுமுறை அளித்துள்ளது என்பது குறிப்பிடத்தக்கது.

இந்த கூட்டத்தில் மறைந்த நடிகர் பி.யூ.சின்னப்பாவின் குடும்பத்தினருக்கு மரியாதை செலுத்துதல், அவரது நூற்றாண்டு விழா வீடியோ மற்றும் நடிகர் சங்கம் செயல்பாடுகள் பற்றிய வீடியோ தொகுப்பும் திரையிடப்படும்.

அத்துடன் நடிகர் சங்கத்தின் டைரக்டரி வெளியீடு மற்றும் ‘‘இணையதளம்’’ வெளியீடும் நடைபெறும். மேலும், தங்களது வாழ்கையை நாடகத்துறைக்கு அர்ப்பணித்த பழம்பெரும் கலைஞர்களை கவுரவித்து சுவாமி சங்கரதாஸ் கலைஞர் விருது மற்றும் பொற்கிழி வழங்கப்படுகிறது.

நடிகர் சங்க துணைத்தலைவர் கருணாஸ் 2014-15-ம் ஆண்டுக்கான ஆண்டறிக்கை மற்றும் தணிக்கை செய்யப்பட்ட வரவு செலவு கணக்கு அறிக்கையை சமர்ப்பிப்பார்.

பொருளாளர் கார்த்தி, சங்கத்தின் எதிர்கால பொருளாதார திட்டமிடல் குறித்தும், பொதுச்செயலாளர் விஷால், சங்கத்தின் எதிர்கால நலத்திட்டங்களை குறித்தும் விளக்கி பேச, துணைத்தலைவர் பொன்வண்ணனின் நன்றி உரையுடன் கூட்டம் நிறைவு பெறும்.

இந்நிகழ்ச்சியில் முன்னணி நடிகர்-நடிகைகள் மற்றும் நாடக கலைஞர்களும் பங்கேற்க உள்ளனர். உறுப்பினர்கள் அனைவரும் தங்களுடைய உறுப்பினர் அட்டையுடன் தவறாமல் பேரவை கூட்டத்தில் பங்கேற்க வேண்டுமென்று நடிகர் சங்க நிர்வாகம் அழைப்பு விடுத்துள்ளது.

இவ்வாறு அந்த அறிக்கையில் கூறப்பட்டிருக்கிறது.


Post your comment





Related News








About Tamil Star, Tamil movies, Tamil Actors, Tamil Actresses, Tamil Cinema & Kollywood
© Copyright Tamil Star Inc, 1999-2018. All rights reserved. Entertainment and Information Portal, TamilStar.com  Privacy Policy | Terms & Conditions