நிலமோசடி வழக்கு: நடிகர்கள் வடிவேலு, சிங்கமுத்து ஐகோர்ட்டில் ஆஜர்

Bookmark and Share

நிலமோசடி வழக்கு: நடிகர்கள் வடிவேலு, சிங்கமுத்து ஐகோர்ட்டில் ஆஜர்

சென்னை தாம்பரத்தை அடுத்த முடிச்சூரில் நடிகர் வடிவேலு 2002-ம் ஆண்டு ராமச்சந்திரன் என்பவரின் வாரிசுகளிடம் இருந்து நிலத்தை வாங்கினார். இதற்கு ‘பவர் ஏஜெண்டாக’ நடிகர் சிங்கமுத்து செயல்பட்டார். இந்த நிலத்தை சுற்றி சுற்றுச்சுவர் கட்ட வடிவேலு முயன்றபோது, பழனியப்பன் என்பவர் நிலத்துக்கு உரிமை கொண்டாடினார்.

இதுகுறித்து விசாரித்தபோது, நிலத்தின் உரிமையாளரான மறைந்த ராமச்சந்திரன், தொழில் முதலீட்டு நிறுவனத்திடம் இந்த நிலத்தை அடமானம் வைத்திருந்தார். கடன் தொகையை திருப்பி செலுத்தாததால் 2006-ம் ஆண்டு தொழில் முதலீட்டு நிறுவனம் அந்த நிலத்தை ஏலம் விட்டது. அதை பழனியப்பன் ஏலம் எடுத்தது வடிவேலுவுக்கு தெரியவந்தது.

இதையடுத்து சென்னை மத்திய குற்றப்பிரிவு போலீசில், நடிகர் சிங்கமுத்து, ராமச்சந்திரனின் வாரிசுகள் கங்கா, சாந்தகுமாரி உள்ளிட்டோர் மீது நடிகர் வடிவேலு புகார் செய்தார். அதன் பேரில் மத்திய குற்றப்பிரிவு போலீசார் வழக்குப்பதிவு செய்தனர். பின்னர் குற்றப்பத்திரிகையை கோர்ட்டில் தாக்கல் செய்தனர்.
இந்த வழக்கு எழும்பூர் கோர்ட்டில் நிலுவையில் இருந்து வருகிறது. இவ்வழக்கை ரத்து செய்யக்கோரி கங்கா உள்பட 5 பேர் 2010-ம் ஆண்டு சென்னை ஐகோர்ட்டில் மனுதாக்கல் செய்தனர். இந்த வழக்கு நீதிபதி எம்.வி.முரளிதரன் முன்பு விசாரணைக்கு வந்தது. அப்போது, நடிகர்கள் வடிவேலு, சிங்கமுத்து மற்றும் கங்கா உள்ளிட்டோர் பேச்சுவார்த்தை நடத்தி சமரசமாக போவதாக அவர்களின் வக்கீல்கள் கூறினர்.
இதை ஏற்றுக்கொண்ட நீதிபதி, நடிகர்கள் வடிவேலு, சிங்கமுத்து உள்ளிட்டோர் ஏப்ரல் 7-ந்தேதி ஆஜராக வேண்டும் என உத்தரவிட்டார். ஆனால் அன்று அவர்கள் ஆஜராகவில்லை. அடுத்த விசாரணைக்கு வராவிட்டால் நடிகர்கள் வடிவேலு, சிங்கமுத்துவுக்கு எதிராக வாரண்டு பிறப்பிக்கப்படும் என நீதிபதி எச்சரித்தார்.

இந்நிலையில், இந்த வழக்கு நேற்று மீண்டும் விசாரணைக்கு வந்தது. வழக்கை நீதிபதி எம்.வி.முரளிதரன் தன்னுடைய அறையில் வைத்து விசாரித்தார். நடிகர்கள் வடிவேலு, சிங்கமுத்து, மனுதாரர்கள் கங்கா உள்பட அனைவரும் நேரில் ஆஜரானார்கள்.

அப்போது அவர்களிடம் நீதிபதி பேச்சுவார்த்தை நடத்தினார். நிலமோசடி வழக்கு மட்டுமல்லாமல், பிற வழக்குகளும் இருதரப்பினர் மீது பதிவு செய்யப்பட்டுள்ளது தெரியவந்தது. பேச்சுவார்த்தை சுமார் 45 நிமிடங்கள் நடந்தும் தோல்வியில் முடிந்தது.

இதையடுத்து கங்கா உள்ளிட்டோர் தாக்கல் செய்த மனு மீதான தீர்ப்பை தேதி குறிப்பிடாமல் தள்ளிவைத்து நீதிபதி உத்தரவிட்டார். பின்னர் வடிவேலுவும், சிங்கமுத்துவும் ஒருவருக்கொருவர் பேசிக்கொள்ளாமல், தங்கள் காரில் ஏறிச்சென்றனர். 


Post your comment





Related News
விஸ்வாசம் படக்குழுவின் முக்கிய அறிவிப்பு
நடிகர் சரவணனுக்கு பன்றிக் காய்ச்சல் - மருத்துவமனையில் சிகிச்சை
விஜய்யின் வளர்ச்சியை கண்டு பயப்படுகிறார்கள் - நடிகர் ராதாரவி பேட்டி
கேள்வி கேட்டதால் வாய்ப்புகள் மறுக்கப்படுகின்றன - ரம்யா நம்பீசன் வேதனை
திருமண வதந்திகளுக்கு அனுஷ்கா முற்றுப்புள்ளி
ஆக்‌‌ஷன் ஹீரோவாகும் சிவகார்த்திகேயன்
ரஜினிகாந்தின் 2.0 விரைவில் ரிலீஸ் - தமிழ்ராக்கர்ஸ் அறிவிப்பு
சர்கார் வழக்கு - ஏ.ஆர்.முருகதாஸை கைது செய்ய தடை விதித்து நீதிமன்றம் உத்தரவு
சர்கார் பிரச்சனை முடிந்தது - கடம்பூர் ராஜூ
சரோஜா தேவி வேடத்தில் நடிக்கும் பிரபல நடிகை








About Tamil Star, Tamil movies, Tamil Actors, Tamil Actresses, Tamil Cinema & Kollywood
© Copyright Tamil Star Inc, 1999-2018. All rights reserved. Entertainment and Information Portal, TamilStar.com  Privacy Policy | Terms & Conditions