சினிமா ரசிகர்களின் இதயங்களில் நீங்கா இடம்பிடித்த “சச்சின்” திரைப்படம், இருபது ஆண்டுகளுக்குப் பிறகு மீண்டும் திரையரங்குகளில் ஒளிர்ந்து கொண்டிருக்கிறது. இளைய தளபதி விஜய் மற்றும் ஜெனிலியா நடிப்பில், ஜான் மஹேந்திரன் இயக்கத்தில் 2005ஆம் ஆண்டு வெளியான இந்த காதல் காவியம், தன்னுடைய மென்மையான காதல் கதையாலும், குறும்புத்தனமான நகைச்சுவை காட்சிகளாலும், தேவா இசையின் மயக்கும் பாடல்களாலும் இன்றும் ரசிகர்களின் மனதை கொள்ளை கொள்கிறது. குறிப்பாக விஜய் மற்றும் வடிவேலுவின் நகைச்சுவை கூட்டணி, திரையரங்குகளில் சிரிப்பலைகளை ஏற்படுத்தியதோடு, இன்றளவும் பலராலும் ரசிக்கப்படுகிறது.
இந்த நிலையில், கடந்த ஏப்ரல் 18ஆம் தேதி “சச்சின்” திரைப்படம் மீண்டும் திரையரங்குகளில் வெளியிடப்பட்டது. விஜய்யின் தீவிர ரசிகர்கள் இந்த மறுவெளியீட்டை திருவிழாவாக கொண்டாடி வருகின்றனர். திரையரங்குகள் முன்பு பட்டாசு வெடித்தும், நடனமாடியும் தங்கள் மகிழ்ச்சியை வெளிப்படுத்தி வருகின்றனர். சமூக வலைத்தளங்களிலும் “சச்சின்” திரைப்படம் குறித்த Nostalgia பதிவுகள் குவிந்து வருகின்றன.
இந்த உற்சாகமான வரவேற்புக்கு மத்தியில், “சச்சின்” திரைப்படம் மறுவெளியீட்டில் வசூல் சாதனை படைத்து வருகிறது. வெளியான இரண்டு நாட்களில் இப்படம் உலக அளவில் ₹4 கோடி வசூல் செய்துள்ளது. இது, ஒரு பழைய திரைப்படம் மீண்டும் வெளியிடப்பட்டு இவ்வளவு பெரிய வசூலை ஈட்டுவது ஆச்சரியத்தை அளிக்கிறது. ரசிகர்கள் தங்களது அபிமான நடிகரின் படத்தை மீண்டும் பெரிய திரையில் பார்ப்பதில் உள்ள ஆர்வத்தையும், படத்தின் மீதான நீங்கா காதலையும் இது காட்டுகிறது. தொடர்ந்து வரும் நாட்களில் “சச்சின்” திரைப்படம் இன்னும் எவ்வளவு வசூல் செய்யும் என்பதை பொறுத்திருந்து பார்ப்போம்.
